Die Dinki Klubhuis is die hart van die koshuis aangesien ons dames in privaat verblyf tuisgaan.

Dinki Dameskoshuis is in 1976 gestig, wat ons die oudste dagkoshuis op die Noordwes-Universiteit se Potchefstroomkampus maak. Daarom spog ons graag met ons stylvolle geskiedenis.

Dinki is ʼn waardegedrewe koshuis wat met passie en hart bestuur word. Familie en susterskap staan voorop vir ons. Ons streef daarna om dames te help groei tot stylvolle volwassenes en is trots op alles wat ons doen, terwyl ons hope pret langs die pad het.

Dinki is passievol oor alles wat ons aanpak en ons huiwer nie om groot drome te droom nie. Ons daag onsself uit en staan saam om ons drome te verwesenlik.

Dinki is sentraal geleë op die kampus, met ons kantoor reg langs die Pukki-winkel in die amfiteater en ons klubhuis oorkant die F10-gebou. Die klein kantoor is oop van Maandag tot Vrydag van 12:00 tot 14:00 en is ʼn miernes van bedrywighede; jy is welkom om self te kom kyk. Almal is welkom.

Ons visie vir die koshuis is om dames ʼn kans te bied om aktief aan die studentelewe op die NWU Potchefstroomkampus deel te neem, om elke dame ʼn gelyke kans te bied om haar talente en gawes in goed gevestigde koshuisaktiwiteite te ontwikkel, en om elke dame die geleentheid te bied om haarself te vind in ʼn koshuis met hegte vriendskapsbande.

Die koshuis se missie is om seker te maak dat die dames ná voltooiing van hul studies die wêreld kan ingaan as volwasse, stylvolle en professionele vroue. Dinki staan op vier pilare. Stylvolle beeld, aktiewe betrokkenheid, eenheid wat ʼn verskil maak, en absolute trots.

Dinki is ʼn koshuis met ʼn ryk geskiedenis en baie jare se gelukkige herinneringe. Ons is baie trots op ons gelukbringer, Petronella die Tweede. In 2013 is Petronella die Eerste “dood” toe Heimat Manskoshuis haar vermoor het, en tot vandag toe is sy nog nie in een stuk teruggevind nie. Met die afsterwe van Petronella die Eerste het ons Petronella die Tweede as ons nuwe gelukbringer gekry. Petronella mag slegs deur HK-lede hanteer word, en wanneer sy nie gebruik word of aan ʼn koshuisaksie deelneem nie, word sy veilig weggesluit. Ons koshuis het ook nie gange nie, maar ons het wel tonnels, want muise bly in tonnels ondergronds.

Ons het ook baie tradisies. Alhoewel geen van die tradisies afgedwing word nie, glo ons dat al die dames daarby sal bly. Die grootste Dinki-tradisie is dat ons dames nie alkohol uit glasbottels drink nie. ʼn Dinki-dame drink altyd uit ʼn glas.

Hierdie is net ʼn klein voorsmakie van hoe dit is om deel te wees van Dinki Dameskoshuis.