“Haar fondasies is gebou in 1961. Huis Republiek, ons is vir jou.”
Hierdie is die woorde wat regdeur jou Universiteit loopbaan en koshuislewe jou hoendervleis gaan gee, jou uit volle bors gaan laat saamsing en jou gaan laat besef: "Hier is waar ek hoort".
Ons visie
Met lojaliteit teenoor en respek vir mekaar wil ons Huis Republiek se volle potensiaal bereik. Ons het passie, ons het trots en met inisiatief sal ons vorentoe beweeg, progressief, maar altyd met die nodige integriteit.
Ons missie
- Die lewering van ‘n daadwerklike bydrae tot die bewaring, aktualisering en uitbouing van die norme en waardes van Huis Republiek en die Noordwes-Universiteit.
- Die skep van ‘n gesonde godsdienstige-, akademiese-, sosiale- en multikulturele atmosfeer in die koshuis vir elke inwoner.
- Die praktiese uitlewing en bevordering van waardes en eienskappe soos lojaliteit, eerbaarheid, gasvryheid, beleefdheid, betroubaarheid, aanvaarbare sosiale optrede, wedersydse respek en die ander doenwaardes van die NWU Potchefstroomkampus.
Motto
Die koshuisleuse is “Vroulikheid met ʼn tikkie andersheid” – waar almal welkom is, wat hul eie tikkie andersheid uitstraal. Die embleem van die koshuis, die Toeternoelie, is ʼn vryheidsvoël wat diversiteit en uniekheid verteenwoordig.
Huis Republiek het 222 trotse inwoners, en elkeen sal jou Repie-suster word. Ons huis is vol ryk koshuistradisies. As jou vlam vir Huis Republiek eers brand, kan dit nie getem word nie. Ons is een van twee dameskoshuise op die kampus waar jy vanaf jou eerste jaar in ʼn enkelkamer in een van ons agt gange kan woon: Allamapstieks, Aphrodite, Caritas, Femme Fatale, Makiti, Hunky Dory, Mirre en Welwitchia.
Huis Republiek…ʼn positiewe houding maak alle laste ligter!